Waatlemoenfees

Desjare het ons vele waatlemoenfeeste in verskeie formate beleef. Ek onthou Nuwejaarsdag se familie-uitspan op ‘n versteekte strand êrens naby Saldanha waar die waatlemoen in die yskoue Weskuswater koud gehou is om namiddag as almal moeg gebaljaar was, te geniet. By verskeie Sondagskooluitstappies was waatlemoen hoog op die spyskaart en ons het ons daaraan vergryp voordat ons die lang pad terug Citrusdal toe vanaf Saldanha aangepak het. Tydens my studentejare het meeste waarlemoenfeeste wat altyd saamgeval het met karnaval, ontaard in woeste waatlemoengevegte.

Maar waatlemoen werk net so goed by ‘n statige maaltyd. ‘n Skeppie geurige salsa om gebraaide forel mee af te rond of repies waatlemoen voorgesit saam met gebraaide calamari met ‘n Oosterse smakie – net reg vir ‘n keurige aansitete. Gebakte camembert met sy loperige binneste saam met heuningneute opgedien op ‘n skyfie waatlemoen of ‘n hemelse pavlova gevul met waatlemoenhartjies en ingelegte gemmer is net die regte manier om die ete stylvol af te sluit.

PANGEBRAAIDE REËNBOOG-FOREL MET WAATLEMOENSALSA

Waatlemoenstukkies saam met appel en dille is onverbeterlik saam met vis. Die smeersous werk ook goed saam met geelbek of selfs snoek. Hier wys ek jou hoe om forel perfek gaar te maak met ‘n lekker bros velletjie.

Genoeg vir 4 mense
Bereiding: 10 min
Gaarmaak: 10 min

SALSA
2 skywe waatlemoen, geskil en in klein blokkies gesny
Handvol dilletakkies, fyn gekap
1 appel, in blokkies dun stokkies gesny
Sap en gerasperde skil van 1 suurlemoen
5 ml (1 t) heelkorrelmosterd
15 ml (1 e) olyfolie
SMEERSOUS
125 g botter
Sap en fyngerasperde skil van 1 suurlemoen
30 ml (2 e) fyn appelkooskonfyt
10 ml (2 e) sojasous
1 knoffelhuisie, fyngedruk
Sout en peper
VIS
Sowat 500 g reënboogforelporsies (4)
60 ml (1/4 k) olie

1 SALSA Meng al die bestanddele saam en hou eenkant gereed.
2 SOUS Smelt die botter in ‘n klein kastrolletjie en voeg die suurlemoensap en -skil by asook die konfyt, sojasous en knoffel. Geur na smaak met sout en peper.
3 VIS Geur die visporsies met sout en peper.
4 Verhit die olie in ‘n kleefvrye pan tot warm. Plaas die porsies, velkant na onder, in die pan en braai 4-5 minute of tot die kante van die vis net pienk begin verkleur en die vel bros is (dis belangrik dat die pan kleefvry is anders sit die vel aan die pan vas). Verf die vleiskant met die smeersous, draai die vis vinnig om met ‘n spaan en braai vinnig vir so ‘n minuut of wat tot die vleiskant net effe verkleur en net liggaar is.
5 Plaas op ‘n dienbord, verf nog van die sous oor en skep van die salsa bo-op.
Sit dadelik voor.

OOSTERSE WAATLEMOEN-EN-CALAMARI-SLAAI

Die Oosterse smake van sojasous, hoisinsous rysasyn en gemmer saam met gekapte koljanderblare, stukkies waatlemoen en avokado is ongenadiglik lekker saam met calamari, wat gaargestoom word.

Genoeg vir 4 mense
Bereiding: 15 min
Gaarmaak: 10 min

SLAAI
15 ml (2 e) hoisinsous
500 g bevrore calamaribuise, -sirkels of baba-inkvistentakels
1 x Oosterse slaaisous (sien onder)
3 skywe waatlemoen, geskil en in lang vingers gesny
½ komkommer, in stokkies gesny
2–3 stingeluie, in dun repies gesny
1 avokado, in dun skyfies gesny of fyngemaak tot glad
VOORSIT
Piekelgemmer
Sesamsaad
Mini-kruie of groot hand vol gekapte koljanderblare (opsioneel)

1 SLAAI Giet die hoisinsous oor die seekos en stoom tot dit net gaar is en wit is, sowat 5 minute.
2 Berei die slaaisous en giet die helfte van die slaaisous oor terwyl dit nog warm is.
3 Meng die res van die slaaibestanddele, voeg die seekos by en meng liggies deur. Voeg nog sous by soos nodig (INdien jy die avokado fyngemaak het, kan jy hopies daarvan oraloor die slaai skep nadat jy dit in ‘n opdienbord geskep het).
3 VOORSIT Skep die slaai in ’n groot opdienbord en sprinkel die piekelgemmer en sesamsaad oor. Rond af met mini-kruie of koljanderblare.

OOSTERSE SLAAISOUS

Maak sowat 250 ml (1 k) slaaisous
Bereiding: 10 min

80 ml (⅓ k) kanola-olie
45–60 ml (3–4 e) rysasyn
Sap en gerasperde skil van 2 suurlemoene
15 ml (1 e) heuning of bruinsuiker
80 ml (⅓ k) sojasous
5 ml (1 t) vissous
1 knoffelhuisie, geskil en in blokkies gesny
30 ml (2 e) sesamsaad
3 cm gemmerwortel, geskil en in dun repies gesny
1 heel brandrissie

1 Meng al die bestanddele saam buiten die brandrissie. Giet in ’n glasfles.
2 Plaas die heel brandrissie in die bottel. Maak toe. Gebruik die sous soos benodig.

PAVLOVA MET WAATLEMOEN EN GEMMER

Gemmer en waatlemoen is ‘n heerlike kombinasie en sorg vir ‘n perfekte bolaag vir pavlova. Vir die mooi het ek die waatlemoen in hartjies uitgedruk.

Genoeg vir 6 mense
Bereiding: 40 min
Gaarmaak: sowat 3 uur

PAVLOVA
6 eierwitte
400 g strooisuiker
10 ml (2 t) appelasyn
15 ml (1 e) mielieblom
5 ml (1 t) vanieljegeursel
125 ml (1/2 k) amandelvlokkies of gekapte amandels of gemengde neute (opsioneel)
VULSEL
250 ml (1 c) dubbelroom jogurt
Sowat 60 ml (1/4 k) gepreserveerde gemmerstukke se stroop
BOLAAG
3 skywe waatlemoen, in stukke gesny of in sterre of hartjies gedruk
125 ml (1/2 k) gepreserveerde gemmerstukke
Ment of basilieblare vir afronding

Voorverhit die oond tot 150°C. Plaas bakpapier op ‘n groot bakplaat, spuit en stuif met mielieblom.
1 Klits die eierwitte in ‘n groot bak tot skuimerig met ‘n elektriese klitster, voeg die strooisuiker lepelsgewys by en klits tot die mengsel styf en glansend is. Vou die asyn in en sif die mielieblom oor. Vou die vanielje en neute liggies in.
2 Skep die meringue op die bakplaat en vorm ‘n rowwe sirkel met ‘n effense holte in die middel. Plaas in die oond en draai die oond af na 120°C. Bak 11/4 uur, skakel die oond af en laat afkoel in die oond vir sowat 2 ure. (moenie die deur oopmaak nie).
3 VIR VOORSIT: Trek die papier versigtig af van die onderkant van die meringue en plaas op ‘n dienbord of koekstaander.
4 Meng die jogurt met die gemmerstroop en skep in die holte.
5 Stapel die waatlemoenstukke bo-op en sprinkel die gemmerstukke oor. Rond af met ment- of basilieblare.

WAATLEMOENSKYWE MET GEBAKTE CAMEMBERT EN HEUNINGNEUTE

Die loperige camembert saam met die heuningneute voorgesit op ‘n skyfie vars waatlemoen sorg werklik vir ‘n hemelse kombinasie.

Genoeg vir 4 mense
Bereiding: 10 min

1 Camembert-kaas
‘n takkie roosmaryn se blare, gekap
60 m l(1/4 k) elk pistasieneute, pampoenpitte en geroosterde sonneblomsade
100 g gemengde neute
Heuning om aan te klam
1 dik skyf waatlemoen

Voorverhit die oond tot 200°C.
Voer ‘n bakplaatjie met bakpapier uit.
1 Plaas die Camembert op die bakplaatjie en bak sowat 10 minute tot die loperig van binne is, maar die velletjie moenie skeur nie.
2 Meng die roosmaryn, neute en sade met net genoeg heuning om aan te klam en effe loperig te wees.
3 Plaas die skyf waatlemoen op ‘n dienbord en plaas die kaas bo-op.
4 Skep die heuningneute bo-op en sit dadelik voor.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: