Laas Saterdag het ek die lekkerste kuieroggend saam met befaamde sanger Andriette Norman en so ‘n 13-tal vroue gehad by die Evolve20-studio in Durbanville.
Nadat die dames vinnig opgewarm het saam met een van Evolve20 se afrigters, het hulle aangesit vir ‘n heerlike ontbyt, alles gemaak volgens die riglyne vir beter “gut” gesondheid. Die sprankelende Andriette het hulle meer vertel van haar eie reis tot beter “gut” gesondheid en hoe sy uiteindelik by die wenresep uitgekom het om gesonder te eet en te leef met uitstekende resultate.
Syself, ‘n gekwalifiseerde voedingkundige, kan met gesag praat oor wat kan en wat nie en eetplanne opstel. Tussendeur kon die vroue teug aan ‘n vars groen sappie en peusel aan groente-frittata-tertjies gemaak met bekostigbare bestanddele soos kool, wortels, groen soetrissies en boontjiespruite wat ek gemaak het. Ook op die tafel was ook daardie heerlike hawermout-saadbrood waarvan ek julle nou al so baie maal vertel het, daarby my treffer patathoemoes, ‘n heerlike kombinasie. Toe was dit tyd dat ek die dames vinnig kon touwys maak hoe maklik dit is om ‘n skudomelet te maak, gevul met ‘n heerlike tamatiegroentevulsel. Iets wat jy tot kan gebruik om ‘n groente-lasagne mee te maak.
In die NutriBullet maak ek ook deesdae graag my eie pesto’s – van basilie tot koljanderpesto en self sook die hoemoes. Ek gebruik glad nie meer kaas in my pesto’s nie en maak van bekostigbare sade soos sonneblomsade en pampoensade gebruik pleks van duur pistasieneute.
Ter afsluiting het ek hulle ook vinnig gewys hoe om ‘n groen detox-smoothie te maak – verspot maklik om te maak in die NutriBullet en heerlik verfrissend, gemaak met ‘n handvol baba-spinasie, dik skyf pynappel en halwe groen appel en stukkie piesang. Daarby die sap van ‘n halwe suurlemoen en ‘n goeie skoot Revive en Rescue-rooibostee van Carmién Tea. Dit help baie dat die bestanddele makliker fynkap in die NutriBullet en die geure van die boegoe, brandrissie en gemmer glad nie te skerp nie. As jy wil, ‘n skeppie of wat volroom natuurlike jogurt (deesdae is dit my go-to ontbyt).
Lees ook meer oor die beste en slegste kosse vir “gut” health hier.
SKUDOMELET
‘n Gesondheidskommel-maker kan vir meer as net gesondheidskommels ingespan word. Doodmaklik om te gebruik om ‘n pofomelet in te maak. Vul dit met allerlei groentes en slaai en dit kan instaan vir van ontbyt tot ‘n heerlike aandete.
GENOEG VIR 2 MENSE
Bereiding: 10 min.
Gaarmaak: 10 min.
OMELET
5 eiers (3 eierwitte en 2 heel eiers)
knoffel-en-kruie-speserye; sout en vars gemaalde swartpeper na smaak
VULSEL
Tamatiegroente (sien resep)
½ wiel swartpeperfeta
¼ avokado, in stukke geskep met ‘n lepel
Basiliepesto (sien resep)
roketblare
1 OMELET Plaas die eiers, melk, speserye en sout en peper in ’n plastiekhouer met ’n deksel (‘n gesondheidskommel-maker werk ideaal). Skud baie goed tot lekker skuimerig.
2 Bespuit ’n kleefvrye pan (ek het my groot LeCreuset-pan gebruik) met kossproei of smelt klapperolie daarin en giet die mengsel daarin. Plaas ’n deksel op en verhit tot die omelet lekker hoog gepof en gaar is. Dis onnodig om die omelet om te draai, maar lig net van tyd tot tyd die kante sodat die rou eier onder kan inloop.
3 VULSEL Skep van die tamatiegroente op nadat die omelet halfpad gaar is en maak verder gaar tot die eier nie meer loperig van bo vertoon nie.
4 Sprinkel feta-kaas oor en streep basiliepesto oor.
5 Gly die omelet nou uit op ‘n bord en pak die avokado bo-op. Rond af met roketblare.
6 Sny in skywe en sit dadelik voor.
TAMATIEGROENTE
Die tamatiegroente is baie veelsydig. Maak sommer ‘n hele klompie op ‘n slag en hou in die yskas. Gebruik dit as vulsel vir omelette of maak ‘n groente-lasagne daarmee deur eiervrugskywe te braai en as “pasta” te gebruik. Die witsous maak ek deesdae met chana-meel oftewel lensiemeel. Dan is dit ook glutenvry.
klapperolie
1 eiervrug, in baie klein blokkies gesny
1 pakkie (400 g) gemengde gekapte sampioene
4 knoffelhuisies, fyngedruk
1 rooi soetrissie, ontkern en in blokkies gesny
200 g spinasie, goed afgespoel en in stukkies gesny of so 6 gerasperde murgpampoentjies
8 sondroë tamaties in vinaigrette, gekap
50 g tamatiepasta
20 g basilieblare, in stukkies geskeur
Sout en peper na smaak
1 Smelt die klapperolie in ‘n pan en braai die eiervrug daarin tot lekker sag.
2 Voeg die sampioene, knoffel en soetrissie by en braai tot net sag en geurig.
3 Voeg die spinasie by en verhit tot verwelk.
4 Roer die res van die bestanddele by, geur met sout en peper na smaak en prut tot geurig en nie meer waterig.
BASILIEPESTO
Maak sowat 125 ml (½ k) pesto
2-3 knoffelhuisies, fyngerasper
40 g pietersielie en basilieblare
30-50 g sonneblomsade, effe gerooster
Gerasperde skil en sap van 1 suurlemoen
Sout na smaak
Olyfolie soos nodig
Plaas al die bestanddele vir die pesto buiten die olyfolie in die voedselverwerker (of NutriBullet) en verwerk tot grofweg glad. Voeg die olyfolie deur die tuit by om ‘n loperige mengsel te maak.
Carmen Niehaus 