Glutenvry en nuwerwetse happie

Die seisoen van kuier en samesyn is hier en almal is alewig op soek na iets nuuts om as happiekos voor te sit. Hetsy vir ‘n peuselhappie voor ete of by ‘n skemerkelkie-geleentheid waar die eetgoed meerendeels peuselkos is.

Hierdie nuwerwetse Vietnamese pannekoekies met sy geurige groentevulsel en grondbone-doopsous is ideaal, ook omdat dit boonop glutenvry en vegetaries is. Ek hou daarvan om die vulsel en sousie apart op ‘n groot bord of plank uit te pak sodat elkeen sy eie happie kan saamstel. Die glasplanke uit die Carmen Niehaus Hausware Collection wat ek saam met Swier bemark, is ideaal daarvoor.

Hierdie happies was ‘n treffer by die onlangse bekendstelling van my nuutste boek, Lekker & Goed, heerlike kos propvol heilsaamheid. Met die resepkeuse vir die boek het ek werklik gepoog om onder andere te fokus op geregte wat glutenvry is en daar is ‘n hele 62 glutenvrye resepte ingesluit – buiten vir verskeie glutenvrye brode soos ‘n heerlike kaas-en-uiebrood, mieliebrood en saadbrosbrood is daar poetoepap met sheba, ‘n klappermeelkors vir pizza en souttert, appelkrummeltert, klappermeelplaatkoekies en klappermeel-sjokoladekoek; selfs die kaaskoek is glutenvry en kan jy ook weglê aan ‘n heerlike romerige ryspoeding, grondboontjiebotterkoekies en piesangbrood, gemaak met hawermout. Maak net seker jy gebruik glutenvrye hawermout. Dan praat ons nog nie eers van die heerlike aartappelslaai, viskoekies of visbrijani en ander smullekker vleis- en slaairesepte nie.

Lekker & Goed, heilsame kos propvol heilsaamheid is die ideale Kersgeskenk. Gaan loer veral op Carmién se webtuiste waar jy ‘n lekker pakkie kan opmaak met die boek en allerlei ander spesiale produkte soos die Carmen Niehaus-slaaisouse en -soute as ook van die Carmen Niehaus Haus Collection teedoeke en voorskote.

VIËTNAMESE PANNEKOEKIES

Dié gluten- en suiwelvrye pannekoekies is heerlik lig en ragfyn. Ook ideaal om voor te sit aan vegetariërs en te gebruik vir ’n slaairolletjie saam met ’n grondboontjiedoopsous vir ’n lekker happie vir vooraf peusel. Jy kan ook die die vulsel en sousie apart voorsit sodat elkeen sy eie happie saamstel.

MAAK 10–12 pannekoekies | Bereiding: 15 min | staantyd: 2 uur | Gaarmaak: 20 min

PANNEKOEKBESLAG
100 g Glutagon-bruismeel (of 100 g rysmeel en 15 ml (1 e) mielieblom) (jy kan ook Health Connection Wholefoods se glutenvrye bruismeel gebruik)
2,5 ml (½ t) borrie (opsioneel)
Knippie seesout
200 ml klappermelk
150–200 ml koue water
VULSEL
1 groot wortel, geskil en in dun repies gesny
1 komkommer, pitte uitgekrap met ’n teelepel en in dun repies gesny
½ groot rooi soetrissie, in dun repies gesny
1 avokado, in dun skywe gesny
Groot hand vol boontjiespruite
Groot hand vol vars koljander, basilie en ment
5 groot, sagte blaarslaaiblare, in dun repies gesny
Sesamsaad vir bo-oor sprinkel
VIËTNAMESE SLAAISOUS
20 ml (4 t) water
10 ml (2 t) suiker
5 ml (1 t) vissous of 10 ml (2 t) sojasous
10 ml (2 t) lemmetjiesap
2,5 ml (½ t) droë brandrissievlokkies
5 ml (1 t) fyngedrukte knoffel
GRONDBOONTJIEDOOPSOUS
125 ml (½ k) growwe grondboontjiebotter
125 ml (½ k) ongegeurde jogurt
hand vol vars koljander, fyngekap
15 ml (1 e) hoisinsous
15 ml (1 e) sojasous
3 knoffelhuisies, fyngekap
2 vars rooi brandrissies, ontpit en fyngekap
15 ml (1 e) vars suurlemoensap, of meer na smaak
2 stingeluie, fyngekap
30–60 ml (2–4 e) warm water, of meer soos nodig

1 BESLAG Sif die bruismeel (of rysmeel en mielieblom), borrie en sout saam in ’n groot mengbak. Klits die klappermelk in en voeg net genoeg water stadig by terwyl jy klits om ’n gladde, dun beslag te vorm wat soos skinkroom lyk en die agterkant van ’n lepel sal bedek. Bedek en laat staan minstens 2 uur in die yskas, verkieslik oornag.
2 VULSEL EN SLAAISOUS Meng al die slaaisousbestanddele saam. Giet dit oor die vulselgroentes sodat dit bietjie daarin kan marineer terwyl jy die pannekoekies berei.
3 DOOPSOUS Meng al die bestanddele saam.
4 BEREIDING Verf ’n klein pannetjie met olie, klits die beslag en giet net genoeg daarvan in die pannetjie om die bodem te bedek.
Die pannekoekies behoort dadelik klein gaatjies te maak. Verhit tot die bokant taamlik droog lyk, draai vinnig om en braai tot gaar, net so 1 minuut.
5 Vul die pannekoekies met die vulselgroentes (of sit apart voor sodat elkeen sy eie happie kan saamstel) en sit voor met die grondboontjiedoopsous.

WENKE

  • Pleks van die groentevulsel marineer in die slaaisous, kan jy ook die slaaisous as doopsous voorsit pleks van die grondboontjiesous. Voeg dan net ’n bietjie grondboontjies by die vulsel se bestanddele.
  • Jy kan ook ryspapiervelletjies (die soort wat jy net in water week) gebruik om die vulsels in toe te draai pleks van pannekoekies te bak.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: