Peuselhappies by die feesmaal

Terwyl almal vir oulaas rondskarrel voor daar aangesit word vir die Kersfeesmaal, is dit altyd goed om ‘n paar eetgoedjies vooraf te bedien om almal welkom te laat voel. Die Vietnamese pannekoekies en koue Persiese sop is ideaal om vooraf te bedien, so ook hierdie frittata-tertjies, wat jy ook vir ontbytkos kan uitsit. As ‘n lekker broodtafel jou ding is, probeer gerus ook die lae koolhidraat groente-saadbrood en bros saadbrode of andersins ‘n glutenvyre brood of twee saam met mieliebrood en die bekende volgraan-roerbrood, platbrode of selfs muffins of pizza; almal uit my boek, Lekker & Goed, lekker kos propvol heilsaamheid.

Vir vooraf geniet is ‘n glasie vonkelwyn net die ding, ek bedien graag Piekenierskloof se Wilhelmina MCC of andersins ‘n koue ystee. Daarvoor is Carmién se reeks Cold Brew- rooibostees ideaal. Daar is verskeie geure en al wat jy doen is om ‘n sakkie of wat in ‘n beker met yskoue water te voeg en dit bietjie te laat trek. Ek geniet veral die nuutste geur, Coco Pine, maar die Apple Mint is net so verfrissend.

Hier is ook net weer die spyskaart wat julle kan volg om ‘n heerlike feesmaal te berei, almal met resepte uit my boek, Lekker & Goed, lekker kos propvol heilsaamheid.

SPYSKAART
By aankoms

In jou glas
Piekenierskloof Wilhelmina MCC
Carmién Coco Pine Cold Brew-ystee

Vooraf

Vietnamese pannekoekies met Vietnamese slaaislous en grondboontjiedoopsous
Koue Persiese jogurtsop
Mini frittata-tertjies met parmaham en songedroogte tamaties

Wyn: Piekenierskloof Heirloom White

Op die Tafel

Rooibos-masala couscous
Griekse bulgurslaai met tuna
Mengelslaai met piekelgemmer en lemoenmosterd-slaaisous
Aartappelslaai met bros kappertjiesade
Franse oondhoender
Oosterse baba-inkvistentakelslaai
Vark-oondbraad met vinkel en vrugtesalsa
Gebakte blomkool met blomkoolpuree en kruie-vinaigrette
Brosbrood met hangkaas en tuinpiekels
Groente-saadbrood

Soet

Suurlemoen-meringuetert
Patatbrownies met gepreserveerde gemmer-jogurt
Dadelballetjies

Wyne
Piekenierskloof Grenache Blanc
Piekenierskloof Grenache Noir
Piekenierskloof Cinsault
Piekenierskloof Heirloom Red

Tee
Carmién Citrus Chai
Carmién Creamy Mint
Carmién Turkish Delight
Carmién Floral Berry

Verskeie van die resepte wat op die spyskaart genoem word, het ek ook op my blog geplaas, so jy kan daar gaan loer. Vir die res sal jy die Lekker & Goed-boek moet koop. Die boek is beskikbaar by uitgesoekte boekwinkels, Checkers en op Carmién se webtuiste.

FRITTATA-TERTJIES
Lekker vir ontbyt of selfs as inpakkos.
Maak 6–8 groot muffins | Bereiding: 20 min | Bak: 25 min

TERTJIES
2 uie, gekap
Olie
200 g gerasperde murgpampoentjies en/of gekapte spinasie
100 g fyngekapte sampioene
6 repies bladspek, gekap, of 2 gaar hoenderborsies, gepluis
250 ml (1 k) gerasperde sterk cheddarkaas
1 wiel fetakaas, grof gekrummel
5 ml (1 t) aangemaakte mosterd
250 ml (1 k) ertjies (opsioneel)
20 g gekapte kruie soos pietersielie of koljander
4 songedroogde tamaties in vinaigrette
6 eiers
Sout en peper na smaak
80 ml (⅓ k) natuurlike ongegeurde jogurt
30 ml (2 e) mielieblom

1 Voorverhit die oond tot 180 °C. Bespuit 8 holtes van ’n diep muffinpan deeglik.
2 TERTJIES Braai die uie in ’n bietjie olie tot glasig, voeg die groente by en roerbraai tot net sag en tot alle vloeistof verdamp het.
3 Voeg die spek of hoender, kaas, mosterd, ertjies en kruie by. Meng en skep in die goedgesmeerde muffinholtes. Sprinkel die songedroogde tamaties
bo-op elkeen.
4 Geur die eiers met sout en peper, voeg die jogurt en mielieblom by en klits goed.
5 Giet oor die groentemengsel in die muffinholtes.
6 Bak sowat 25 minute of tot ferm. Sit louwarm of koud voor.

Wenk: Voeg ’n paar gekapte swart olywe by indien verkies.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: