Ek raak net al hoe meer ingeburger hier op die Weskus en leer net meer en meer lekker mense ken. Hoe spesiaal was dit nie om te kon saamkuier met die vroue van die NG Kerk Saldanha by ‘n heerlike vroueoggend nie. Esther van Houwelingen en haar span het omtrent uitgehaal en gewys – en hulle het gekook uit my nuwe boek: Lekker & Goed. Die vroue kon peusel aan die appel-dadelmuffins en daarby saam van Carmién se geurige Cold Brew-tees geniet. Die mengelslaai met piekelgemmer het Esther opgezhuzh met die variasie wat ek voorgestel het en ‘n heerlike romerige kerriehoender daarby gevoeg en dit as hoofgereg voorgesit. Die vroue het omtrent gesmul. Tussendeur kon ek vertel van hoe om gesonder en heilsamer te kook sonder om lekkerte in te boet, soos wat ek dit ook in my boek verduidelik.
Die groot verrassing van die oggend vir my was egter toe ek die ander gasspreker, Elmarie van den Berg ontmoet… net om vas te stel ons ken mekaar eintlik al lank. Sy is ‘n blommevrou van formaat en kan letterlik toor met blomme. Deesdae bly sy ook teen die Weskus daar op Jacobsbaai waarvandaan sy haar nuwe blommebesigheid, Soutbos, bedryf. Hoe inspirend was haar praatjie nie van hoe sy gewys het om van ‘n monochrome natuurlike beige en grys palet met klein byvoegings soomloos te kan oorspoel na swart, dan groen en dan uitspattige kleure nie – alles met dit wat jy sommerso in die verbygaan optel of afknip. Net daar span sy toe sommer ook van my doeke in – Plaasvars met sy eierontwerp pas pragtig by die natuurlike palet; Erfgoed met die veelvoud messegoed op ‘n donker agtergrond maak mooi saam met ‘n swart blokkiesdoek en ‘n foto van haar dogtertjie in ‘n swart raam; Paddastoel met sy spatsels groen bring groenigheid saam met bosse kruie terwyl Sitrusdal met sy uitspattige oranje en geel mooi maak saam met suurlemoene en spinasie. ‘n Melkbeker hier, ‘n paar glaspotte of glaskoepels daar, is al wat jy eintlik addisioneel nodig het. Die lappe is beskikbaar op die Swier-webtuiste en sal binnekort ook saam met die Lekker & Goed-boek op Carmién se webtuiste beskikbaar wees. Die boek is uiteraard ook vanaf 12 November beskikbaar in alle toonaangewende boekwinkels asook Checkers.
Toe almal klaar geluister het, was dit tyd vir ietsie soet en my ou-ou staatmaker rooibos-sjokoladekoek, wat ek na vele probeerslae sover kon kry om die suiker van drie tot ‘n halfkoppie suiker verminder te kry met patat wat help om soetigheid en klammigheid te verskaf laat almal heerlik smul sonder om vir ‘n oomblik skuldig te voel. Daarby ‘n heerlike koppie Carmién-rooibostee – die vroue kon self kies of hulle Citrus Chai, Turkish Delight of Creamy Mint daarby wou geniet.
As julle wil hê ek moet ook vir julle kom kuier, laat weet my gerus. Dit sal vir my lekker wees om by julle ‘n draai te kom gooi. Kyk uit vir Vrydag om die sjokoladekoek se resep te kry.
Carmen Niehaus 