Ek kyk met nuwe oë en groot waardering na Velddrif en sy mense. Op 8 Augustus het ons die mees ongelooflike vroue-kuieraand gehad by Soverby-lapa, net duskant Velddrif op pad Dwarskersbos toe. Knus teen die water sit die klipstruktuur met die houtpaadjie wat jou lei tot waar die branders breek. Die Velddrifvrouens het pragtig mooi gemaak met bosse en bosse proteas saam met ander fynbos – treffend in sy natuurlike eenvoud. Oral op die tafels potjies Carmién tee en Six Hats-wyne van Piekenierskloof Wine Company wat die gaste saam met hul kos kon geniet.
Ek en my tweelingsus, Mientjie Mouton, stigter en CEO van Carmién Tea, het ook bietjie gesels oor ons wedervaringe en ek het ook ‘n gereg of twee demonstreer. Die spyskaart saamgestel met geregte uit my boek, Lekker & Goed, heerlike kos propvol heilsaamheid, wat sjef, Charldo en sy span werklik geurig voorberei het.
Met die aankoms is botterskorsiesop geskink uit die vroue se eetservies-teepotte; vir peusel tussendeur die nou reeds gewilde hawermoud-saadbrood met ‘n spesiale Sandveld-heerbone-hoemoes. Die hoofgereg voorgesit in buffet-to-the-table-styl waar elkeen hulself gehelp het uit borde kos op elke tafel – my treffer Franse hoenderresep met groen olywe en pruimedante wat gereeld op my eie kuiertafel verskyn saam met groente-koeskoes, aangeklam met ‘n boegoe-slaaisous. Vir poeding het Charldo vir elkeen ‘n malvapoedinkie berei, heelwat gesonder met sy vanielje-rooibosstropie oorgegiet. Ons het werklik so spesiaal en gewaardeerd gevoel met die vroue wat lustig meegedoen het in die unieke proe-ervaring van kos en wyn saam met ‘n glasie tee, nie net om die palet skoon te maak nie, maar ook om telkens ander geure van beide die kos en die wyn na vore te bring.
Die boek, Lekker & Goed, heerlike kos propvol heilsaamheid, is te kry by boekwinkels asook aanlyn by Lapa en Carmién Tea.
FRANSE OONDHOENDER
Vir hierdie resep gebruik ek deesdae swart knoffel, wat verouder is en pleks van slegs pruimedante gebruik ek ‘n verskeidenheid droëvrugte soos sultanas en Turkse appelkose saam met die pruimedante. Die kombinasie saam met die groen olywe is onverbeterlik.
Genoeg vir 6—8 mense
Bereiding: 20 min
Marineertyd:
Gaarmaak: 11/2 uur
MARINADE
2 bolle knoffel of andersins swart knoffel
60 ml (1/4 k) olyfolie
60 ml (1/4 k) houtverouderde balsamieke asyn
80 ml (1/4 k) basilieblare of oreganum
HOENDER
12 hoenderporsies (dytjies en boudjies maar nie borsies), helfte se velle verwyder
Sout en peper
250 ml (1 k) wit wyn
125 ml (1/2 k) kappertjiesaad (verkieslik met lang stele)
30 groen olywe
125 ml (1/2 k) veelkleur-sultanas (opsioneel)
100 g Turkse appelkose, gekap (opsioneel)
12 pruimedante
40 g vars koljanderblare
Voorverhit die oond tot 180°C. Smeer ‘n oondbak.
1 MARINADE Mikrogolf die knoffelbolle, skil en al, vir 3-5 minute of tot hulle sag is, (die swart knoffel kan jy net so gebruik), druk die puree uit en meng met res van die bestanddele vir die marinade.
2 HOENDER Pak die hoender in ‘n nie-metaal oondbak, giet die marinade oor die hoender en marineer vir ‘n uur of twee. Geur met sout en peper, voeg die wit wyn oor en voeg die kappertjiesaad, olywe en droëvrugte by asook helfte van die koljanderblare.
3 Bedek en bak 11/4 uur tot die hoender sag en gaar en goudbruin is. Sprinkel die orige koljanderblare oor en sit voor met gestampte koring of koeskoes en slaai.
Carmen Niehaus 